Letërsi - SHKURTI, Spiro - Kontribut per hartën kostumologjike të rrethit te Sarandës

Në fillim të shekullit tonë, brenda rrethit administrativ të Sarandës, ishin krijuar gjashtë rrethina kostumologjike për veshjet e grave: rrethina e Bregdetit, e Vurgut, e Mursisë, e Theollogos (Partizanit), e Muzinës dhe e Konispolit. Në këto rrethina nuk kemi përfshirë veshjen e fshatit Karroq (1) , që ishte e dallueshme nga veshjet e fshatrave të tjera përreth, për arsye se kjo gjendet vetëm në një fshat brenda kufirit tonë politik shtetëror. Gjithashtu, nuk kemi përfshirë as veshjet e blegtorëve vllehë, që dimëronin në kullotat e këtij rrethi (2) .

Më poshtë po analizojmë veshjet e përdorura nga gratë sipas rrethinave të mësipërme etnografike, duke shqyrtuar jo vetëm veshjet e përdorura prej tyre deri në gjysmën e parë të shekullit tonë, por edhe veshjet pasardhëse.

(1)

Veshja e fshatit Karroq paraqet një ishull të izoluar. Ajo ka ndryshime me veshjen e rrethinave kufitare me të (Theollogo, Çamëri). Sipas materialit të mbledhur në terren, kjo veshje përdorej në një numër fshatrash që fillonin nga Janina e vazhdonte deri në fshatin Karroq, si skaji më veriperëndimor i përdorimit të saj. Këtu po japim vetëm materialin e nevojshëm ilustrativ, pa u ndalë në analizën e kësaj rrethine.

Fig. 3. Veshja me fund e peshli.

(2)

Vllehtë, me kopetë e tyre, kanë dimëruar edhe në rrethin e Sarandës, veçanërisht në fushën e Konispolit, të Mursisë dhe në fushën e Vrugut. Mbas Çlirimit të vendit, një pjesë e familjeve vllehë u ngul në vendbanime të përhershme, që janë të pakta e të shpërndara. Për këto arsye nuk do të ndalemi në analizën e tyre.

Më lartë
webmaster@letersi.com