Dy fjalë lexuesve

Mihal Grameno njifet ndër lexuesit tanë më shumë si shkrimtar se sa si gazetar e publicist i talentuar. Megjithatë krijimtaria e tij letrare nuk njihet krejtësisht. Një pjesë e mirë e vjershave, dy dramat, portretet, disa artikuj e reportazhe interesante, pamfletet e fejtonet nuk ka qenë e mundur të bien deri më tash në duar të nxënësve, të studentëve, të mësuesve, të profesorëve dhe të tjerëve. Prandaj qëllimi ynë kryesor ishte që, duke bëre zgjedhjen nga prodhimi i tërësishëm letrar-publicistik, t’u bëhet e mundshme lexuesve që të kenë një pasqyrë më të plotë të shkrimeve të bollshme të Mihal Gramenos, disa prej të cilave janë mjaft të bukura.

Në kuadrin e poezisë u morën edhe disa vjersha, që nuk janë në përmbledhjen “Plagët” botuar në Manastir më 1912. Ato u nxorën kryesisht nga “Kalendari kombiar”, nga gazetat “Kombi”, “Shpnesa e Shqypenisë”, “Shqypeja e Shqipnis”, “Liria” e gazetat e tjera. Po kështu u hoqën nga kjo përmbledhje poezitë e autorëve të ndryshëm, që ishin përfshirë.

Dramat “Mallkimi i gjuhës shqipe” dhe “Vdekja e Piros” u botuan pa farë ndryshimesh.

Tri novelat “Oxhaku”, “E pulhura” e “Varri i pagëzimit” si dhe pjesa e parë e “Kryengritjes shqiptare” u morën nga libri “Novela dhe kujtime”, të cilin e botoi më 1969 Enti Krahinor i Botimit të Teksteve Shkollore. Ndërkaq, portretet, artikujt, pamfletet e fejtonet u morën nga libri “Antikat kombëtare”. Këtë libër e botoi më 1974 Shtëpia Botuese “Naim Frashëri” e Tiranës. Mbledhjen, pajisjen me shënime dhe përgatitjen për shtyp të shkrimeve në të e bëri Piro Tako.

Në mbështetje të kësaj zgjedhjeve, shpresojmë se lexuesi do të ketë mundësi të njohë më mirë Mihal Gramenon poet, dramaturg, novelist, autor memoaresh e portretesh, pamfletist e fejtonist.

Y. B.

Më lartë
webmaster@letersi.com