Deti publik

Mileti... bisedonte me nxehtësi të madhe. Çështja e bisedimit ishte mbi monopolet që krijoi qeveria përmbi fletën e cigares dhe shkrepsen. Që të gjithë bërtisnin duke thënë që mirë, mor jahu, se e bëri monopol, po ku i ka fletët dhe shkrepset? Si u menduan vendosën të venin të qaheshin në qeveritarët, po edhe këta nuk dinin ç’t’u përgjigjeshin, përveç duke i këshilluar të kishin durim se për së afërmi kishin për të ardhur.

Në Korçë telashi ishte më i madh. Si u mblodh mileti, vanë në prefekture duke bërtitur që donin fletë cigaresh dhe shkrepse, se që kur u bënë monopol shteti, tregëtarët me rixha shumë ua shesin shtatë herë më shtrenjtë se përpara.

Prefekti mbajti një oratori, po që të shpëtonte lehtë u tha që çështja e monopolit nuk ishte e kompetencës së tij po e financave... Me të arritur në financë doli direktori, i cili prapë u tregoi kompetencën dhe dërgoi në Deti Publik!

Në Deti Publik! Në Deti Publik! Edhe me një zemërim të madh, duke vendosur që ja fletë cigare dhe shkrepse, ja se t’i perëndojnë nga zyrat.

Sejfulla Efendiu, direktori, po bisedonte me ndihmësin e tij, Mustafanë, kur dëgjoi: “Duam fletë cigare dhe shkrepse se nuk ndahemi që këtej!” I gjori Sejfullah dhe Mustafa, kur panë gjithë atë milet u verdhën si dyllë e zunë të kruajnë kryet... Pastaj dualën duke thënë:

— Ç’kini me ne fakirët, kështu na urdhëruan, kështu bëmë.

— Ju, ju vutë monopolin, prandaj ja fletë cigare dhe shkrepse, ja bëni hesap kohën se na rroptë lëkurën!...

Si e pa pisk, Sejfullahu u tha që të venin Bë bashku në telegrafë e të pyesnin qeverinë në Tiranë.

Këtë proponim e pranuan dhe shkuan, duke patur në krye Sejfullahun, direktorë dhe ndihmësin, Mustafanë, në telegrafanë ku Sejfullahu i telegrafisi qeverisë për telashin e madh që bëhej për monopolin.

Qeveria e Tiranës vrapoi të përgjigjej kësisoi: “Ministri i Financave duke u përkujdesur për shëndetin e popullit dërgoi në Evropë një komision me më të mirët kimistë që të analizojnë fletën dhe shkrepsen, si dhe një komision që të zgjedhin një nga fabrikat më të mira. Përveç këtyre Ministria e Financave u muar vesh me Ministrinë e P. të Brendshme që për të lehtësuar popullin dërgoi një komision në Evropë... që të biejnë dy vaporë... kështu që populli le të mburret edhe gëzohet që arrimë ditën, kur vaporët tanë do të përçajnë oqeanet e gjithë botës!...

— Mirë, mirë po halli i shkrepsave edhe fletës qysh do t’u bëhet? Isaf me nuskat se u ngopëm! Me se të ndezim dritën mbrëmjeve?

“Koha”, 1922, nr. 91

(1)	Deti Publik — Qeveria e Iliaz Vrionit më 1921 formal edhe zyrat e detyrimit publik.

Më lartë
webmaster@letersi.com