Bashkim dhe përparimi

Si gjithë bota, kështu edhe shqiptarët (2) arrinë të mësojnë, si papagalloja, fjalën “bashkim e përparim”, edhe kësisoj pandehnë edhe pandehin që u sosnë taksiratet e gjithë hallet, edhe rne këtë mënyrë e mbushnë plotësisht detyrën.

Një ëndër si ëndërat! Me të këtilla ëndëra është xvarrosur bota gjer më sot në udhën e ligësisë, hajdutërisë dhe gjakpirësisë, nga të fuqishmit e ditës, duke përfituar nga këto fjalë “bashkim e përparim”, të cilat fjalë ishin vetëm vegla për të gënjyer popujt e mjerë!

Këto fjalë ishin shtruar në programet e fillosofëvet të vjetër, si edhe të profetëvet tanë, po mjerisht, as Krishti, as Muhameti nuk mundnë t’i venë në veprim, se farisenjtë (3) kapitalistët gjakpirës, imperialistët dhe gjithë egoistët dëshironin që, me këto fjalë të shenjta, të përçanin edhe armiqësonin botën e jo që t’i bashkonin e vëllazëronin, se atëhere, pa fjalë, nuk mund të mbushnin dëshirat e tyre. Gjaku, pra, që u derdhi edhe po derdhet prej kaqë vitesh, midis popujve të Europës, rrjedh nga këta Farisenj, të cilët kanë etje për gjak edhe vetëm për gjak!

Lumtërisht, ose si nonjë bekim i Zotit, dolli në botë Xhaxha-Lenini, që t’i vejë me të vërtetë në veprim, “bashkim dhe përparim”! Çakenjtë gjakpirës të botës, përnjërjesh, u bashkuan që të gjithë për të ndalur dritën e vërtetë edhe, për këtë qëllim satanik, nuk lanë asgjësendi pa përdorur. Kanë tri vite që kanë mbledhur fuqitë e tyre për të dërmuar këtë marshim, po më kot u munduan se u dërmuan përpara së drejtës e së vërtetës! Ranë dhe do të bien përmbysë ata që i kundërshtonen Xhaxha-Leninit edhe bolshevikëvet!

Lenini nuk do vetëm lirimin e popullit rus, po të gjithë botës; do qe çdo njeri të rronjë për njeri (4) në botë edhe kurrë rob. Prandaj që nga të katër çipat e dheut bashkohen me qëllimet e tij të nalta e të shenjta duke ju lutur Zotit t’i falnjë jetë të gjatë. Atë që nuk muntnë të mbushin Krishti me Muhametin, po e mbush Xhaxha-Lenini. Sot nuk pyesin çfarë fe ke, po a do njerëzimin? Atheistët të Indisë, Afrikës Asisë e gjithë botës, të cilët quheshin për egërsira nga krokodillët Ferisenj të Evropës, u shkundën nga drunjësija (5) , edhe sot, pa pyetur, bashkohen në program të Leninit.

Profesorët e mëdhenj, shkrimtarët edhe gjithë savantët e botës, të cilët në krye ishin kundra, duke pandehur nonjë karagjozllëk (6) si gjer më sot, e kanë rrethuar Xhaxhanë se e shohin që shpëtimi i botës ay dhe ay është!

Ja bashkimi e përparimi qysh bëhet! Duhet dorë e hekurtë, drejtësi, njëjësi, vëllezëri edhe jo djallëzi, që të arrish vërtet këtë qëllim. Lenini nuk kupton kaur, turq, armen, çifutër, atheistë ose budistë edhe çfarëdo; se që të gjithë janë vëllezër e duhet të kenë një vëllezëri të vërtetë.

Do të dalin pra udhëheqës shqiptarë për kombin e tyre, që t’i përmbledhin e t’u tregojnë që s’janë as kaurë, as turq, po vetëm që janë shqiptarë?

Këtu qëndron bashkimi e përparimi.

“Koha”, 1916, nr. 80

(1)	Artikulli u botue në gazetën ,,Koha” të Korçës më 18. IX. 1920.
(2)	Mendon në politikanët.
(3)	Farisenjtë — të pabesët, të liqtë.
(4)	Për njeri, — si njeri.
(5)	Drunjësija, — idolatrija, neol.
(6)	Karagjozllëk, fq. palaçollëk, akt për të qeshur, si ata që kanë ngjarë gjer më sot, thotë G. d.m.th. si aktet e tjera që gjoja do t’i jepnin liri popullit; — e ka fjalën te revolucionet e reformat borgjeze.

Më lartë
webmaster@letersi.com